યોગેશ્વર

 જે કરે વસ્ત્રો હરે, તે ચીર પણ પૂરે કદી,

વાત છે વિશ્વાસની, શરણાગતીની વાત છે.

ગોપબાળો સંગ રમતો, યુદ્ધ માં પણ ખેલતો,

વાત છે સૌહાર્દની, વીરત્વની પણ વાત છે.

ગોકુળે ગાયો ચરાવે, હસ્તે ગોવર્ધન ધરે,

વાત છે પુરુષાર્થની, સામર્થ્યની પણ વાત છે.

ગોપીઓ સંગ રાચતો, શત્રુને યે સંહારતો,

વાત છે જો પ્રેમની, તો દંડની પણ વાત છે.

વાંસળી હોઠે ધરે, ગીતા ય એ સંભળાવતો,

વાત છે સંગીતની તો જ્ઞાનની પણ વાત છે.

સૌનો તારણહાર એ ને મિત્ર કાજે સારથી,

વાત છે ઉદ્ધારની, તો સખ્યની પણ વાત છે.

ચક્ર પણ એ ધારતો, ને વિષ્ટિમાં પણ  મોખરે,

વાત છે જો યુદ્ધ ની તો શાંતિની પણ વાત છે.

16 August 2025

કૃષ્ણ જન્માષ્ટમી