એવો હું નથી

મંદિરોના દ્વાર પર અથડાઉં, એવો હું નથી,

કોઇનો પડછાયો થઇ પૂજાઉં, એવો હું નથી.

શખ્સિયત છે મારી સઘળાથી જુદી,

મોરનું ઈંડું થઇ ચિતરાઉં, એવો હું નથી.

તારા મોંઢા પર જે કહેવું છે, કહીશ,

પીઠ પાછળ ગીત તારાં ગાઉં, એવો હું નથી.

તેં કરેલા સહુ ગુનાહો માફ છે,

મેં કરેલો પ્યાર ભૂલી જાઉં એવો હું નથી.

મારાં રોમેરોમમાં તારું સ્મરણ,

એ ક્ષણોને ક્ષણમાં ભૂલી જાઉં, એવો હું નથી.

જીંદગીનો હું પ્રવાસી એકલો,

કબ્રમાં કોઇના ટેકે જાઉં, એવો હું નથી.

તું ને હું

તું ને હું ના બે સીમાડા,
આજ કાલ ના આ સરવાળા!
વ્યસ્તતાનું બહાનું કરીને,
એક બીજાને છેતરનારા!
સામે બારણે બેઠાં તોયે,
એક બીજાથી સંતાનારા!
કોઈને કોઈ બહાનાં લઈને,
બધો સમય બસ બાખડનારા!
સમય નદી ને, ક્ષણો વહેણ સમ,
એક જગાએ ના રહેનારા!
એક નદીના બે જ કિનારા,
તોયે કદીયે ના મળનારા.